Manchester City konfirmoi zyrtarisht largimin e mesfushorit portugez Bernardo Silva në verë, në fund të kontratës së tij.
31-vjeçari iu bashkua klubit në vitin 2017 nga Monaco dhe ka luajtur 451 ndeshje në të gjitha garat, duke u renditur midis lojtarëve me më shumë paraqitje në historinë e Cityt. Gjatë kësaj periudhe, ai regjistroi 76 gola dhe 77 asistime.
Silva, kapiten i ekipit këtë sezon, ka fituar 19 trofe madhorë me fanellën e Manchester Cityt, midis të cilëve spikasin 6 tituj të Premier League, 1 Ligë e Kampionëve, 2 Kupa FA, 5 Kupa të Ligës angleze, 1 Kupë e Botës për Klube dhe 1 Superkupë e Evropës. Trofeu i fundit ishte Kupa e Ligës në vitin 2026 kundër Arsenalit.
Në një postim në Instagram, Silva shkroi: «Kur mbërrita 9 vjet më parë, po ndiqja ëndrrën e një djali të vogël, duke dashur të kisha sukses në jetë, duke dashur të arrija gjëra të mëdha. Ky qytet dhe ky klub më dhanë shumë më tepër se kaq, shumë më tepër sesa kam shpresuar ndonjëherë. Ajo që fituam dhe arritëm së bashku është një trashëgimi që do të ruhet përgjithmonë në zemrën time».
Pavarësisht largimit, Silva do të vijojë të luajë deri në fund të sezonit, ndërsa City mbetet në garë për titullin e Premier Leagues dhe Kupën FA, nën drejtimin e trajnerit Pep Guardiola. Klubi theksoi se portugezi do të nderohet siç duhet. Sa i përket të ardhmes, Barcelona dhe Juventus shihen si skuadra të interesuara.