Autoritetet policore në Leskovc kanë ndaluar një shtetas nga Maqedonia e Veriut, i cili dyshohet se ka shkaktuar një aksident rrugor me pasojë plagosjen e rëndë të një shoferi të shërbimit të urgjencës. Për të dyshuarin është caktuar masa e ndalimit prej 48 orësh.
Aksidenti ndodhi gjatë pasdites në afërsi të Grdelicës, kur një autoambulancë që po transportonte një fëmijë 10-vjeçar nga Vranja drejt Nishit pësoi një defekt teknik. Teksa shoferi kishte dalë nga mjeti për të riparuar avarinë në korsinë e emergjencës, kamioni i drejtuar nga shtetasi maqedonas është përplasur me derën e hapur të autoambulancës. Për shkak të forcës së goditjes, dera e mjetit ka goditur shoferin, i cili është rrëzuar dhe ka përplasur kokën në sipërfaqen e betonit.
I plagosuri është dërguar për trajtim mjekësor në Qendrën Klinike Universitare në Nish. Ndërkohë, për sa i përket djalit 10-vjeçar, i cili kishte nevojë për ndërhyrje urgjente për shkak të dyshimeve për apendicit, një mjeke që ndodhej rastësisht në vendin e ngjarjes ka ndërhyrë duke e marrë atë me mjetin e saj personal për ta transportuar në spitalin e Nishit.