Ministri në detyrë i Mbrojtjes, Ejup Maqedonci, përfaqësoi Republikën e Kosovës në takimin e 35-të të Grupit të Kontaktit për Mbrojtjen e Ukrainës, të mbajtur në selinë qendrore të NATO-s në Bruksel. Në këtë takim morën pjesë rreth 50 ministra të mbrojtjes nga vendet anëtare dhe shtetet partnere, të cilët diskutuan zhvillimet e fundit në fushëbetejë dhe situatën e sigurisë.
Takimi u udhëhoq nga Sekretari i Përgjithshëm i NATO-s, Mark Rutte, ministri gjerman i Mbrojtjes, Boris Pistorius, dhe përfaqësuesi i Mbretërisë së Bashkuar, Dan Jarvis. Pjesëmarrësit rikonfirmuan mbështetjen e tyre për mbrojtjen e sovranitetit dhe integritetit territorial të Ukrainës kundër agresionit rus.
Ministri Maqedonci deklaroi se Kosova është një kontribuese aktive, duke theksuar ndihmat përmes pakove ushtarake të dhëna në vitin 2023 dhe trajnimet e ushtarakëve ukrainas si në Kosovë, ashtu edhe në Mbretërinë e Bashkuar në kuadër të operacionit Interflex.
Gjatë takimeve bilaterale në margjinat e vizitës, Maqedonci diskutoi me zyrtarë të NATO-s dhe ministra të vendeve partnere për sfidat e sigurisë. Në këto takime u vlerësua pozitivisht përmirësimi i situatës së sigurisë në Kosovë.