Mbrojtësi 24-vjeçar, Marash Kumbulla, është drejt një aventure të re në futbollin spanjoll. Sipas raportimeve të fundit, klubi i Romës dhe ai i Rayo Vallecanos kanë hyrë në fazën përfundimtare të bisedimeve për huazimin e lojtarit. Negociatat po mbyllen me sukses dhe pritet që në ditët në vijim të përfundojnë procedurat administrative dhe dokumentacioni i nevojshëm për zyrtarizimin e këtij transferimi.
Kumbulla, i cili zotëron edhe 2 vite kontratë me klubin italian, nuk bën pjesë në planet e menjëhershme të Romës. Ky transferim shihet si një mundësi për mbrojtësin që të rikthejë ritmin dhe formën e tij pas periudhave të vështira të shkaktuara nga dëmtimet dhe konkurrenca e lartë. Te Rayo Vallecano, ai do të ketë mundësinë të bashkohet me mbrojtësin tjetër të Kombëtares shqiptare, Ivan Balliu.
Kjo lëvizje shënon vazhdimësinë e karrierës së lojtarit në kampionatin spanjoll. Për Marash Kumbullën, kjo do të jetë një eksperiencë e mëtejshme në La Liga, pas periudhave të mëparshme ku ka qenë pjesë e skuadrave si Espanyol dhe Mallorca, po përmes formulës së huazimit.
Përditësime
Ky transferim vjen pas një periudhe të luhatshme për Marash Kumbullën në La Liga. Sezonin e kaluar te Espanyol, mbrojtësi shfaqi vazhdimësi duke regjistruar 35 ndeshje dhe 3 gola. Në të kundërt, eksperienca te Mallorca u kushtëzua nga dëmtimet, të cilat e mbajtën atë jashtë fushave për më shumë se 100 ditë, duke e kufizuar në vetëm 8 ndeshje. Kumbulla u transferua te Roma në vitin 2020 nga Verona për 25 milionë euro, periudhë gjatë së cilës punoi nën drejtimin e trajnerit Jose Mourinho.
Sipas mediave italiane, AS Roma e ka përjashtuar zyrtarisht Marash Kumbullën nga planet për sezonin e ri. Mbrojtësi 24-vjeçar është në negociata të avancuara për një transferim te Rayo Vallecano.