Deputetja Marjana Koçeku, e cila aktualisht ushtron detyrën si deputete e pavarur pas largimit nga grupi parlamentar i Partisë Socialiste, zhvilloi një takim në kryeqytet me eurodeputeten franceze dhe aktivisten për të drejtat sociale e mjedisore, Emma Fourreau.
Vizita e Fourreau në Shqipëri është ndërmarrë në shenjë mbështetjeje për protestën qytetare, e cila vijon prej 44 ditësh. Gjatë bisedës, temat kryesore të fokusuara ishin sfidat mjedisore, roli i përfshirjes qytetare dhe vullneti politik për mbrojtjen e ekosistemit.
Sipas Koçekut, mbrojtja e natyrës nuk duhet të shihet si pengesë për progresin ekonomik apo zhvillimin, por si treguesi më i fuqishëm i përgjegjshmërisë shtetërore ndaj qytetarëve dhe aspiratave për integrim në Bashkimin Europian. Ajo theksoi se çështjet mjedisore nuk u binden ndasive partiake dhe se natyra nuk negocion me vendimet e gabuara, duke qenë se ajo ose ruhet, ose humbet.