Presidentja e Komisionit Europian Ursula von der Leyen e ka përshkruar marrëveshjen tregtare midis Bashkimit Europian dhe Indisë si “nëna e të gjitha marrëveshjeve”, ndërsa kryeministri indian Narendra Modi e ka cilësuar “historike”. Nëse realizohet, kjo marrëveshje do të ndikojë në pothuajse 2 miliardë njerëz që jetojnë në ekonomi të cilat përbëjnë rreth një të katërtën e Prodhimit të Brendshëm Bruto global dhe një të tretën e tregtisë botërore.
Negociatat kanë zgjatur më shumë se dy dekada. Ato u nisën në vitin 2007, në një periudhë lulëzimi të marrëveshjeve të tregtisë së lirë, por u bllokuan në vitin 2013 për shkak të mosmarrëveshjeve mbi qasjen në treg dhe tarifat doganore. Bisedimet u rifilluan në korrik të vitit 2022, në kontekstin e tensioneve në rritje midis BE-së dhe Kinës, si dhe të rivlerësimit evropian të sigurisë ekonomike pas pushtimit rus të Ukrainës.
Marrëveshja pritet të eliminojë ose të ulë tarifat për gati 97% të mallrave të shkëmbyera. Përtej tregtisë, ajo sinjalizon bashkëpunim ekonomik më të thellë dhe diversifikim partneritetesh, në mes të tensioneve globale tregtare dhe marrëdhënieve komplekse me fuqi të tjera të mëdha. BE-ja trajton varësitë ekonomike në sektorë si energjia, mineralet kritike, gjysmëpërçuesit, farmaceutikët dhe teknologjitë e pastra si rreziqe strategjike për sigurinë.
Bashkimi Europian është një nga partnerët kryesorë tregtarë të Indisë. Tregtia dypalëshe e mallrave kaloi 120 miliardë euro në vitin 2024. Eksportet e BE-së drejt Indisë arritën rreth 55 miliardë euro, ndërsa eksportet indiane drejt BE-së u rritën me më shumë se 70% midis viteve 2018 dhe 2023, duke arritur në 71 miliardë euro.