Gjykata e Vlorës ka caktuar masën e sigurisë “Arrest në burg” për tre shtetasit e arrestuar gjatë operacionit policor të koduar “Rrjetet”. Të arrestuarit janë Granit Pepnika, Xhoni Hitaj dhe Redion Rexhmati, të cilët u prangosën në zonën e Drimadhës nga strukturat e Policisë së Shtetit.
Sipas vendimit të gjykatës, Granit Pepnika dhe Xhoni Hitaj akuzohen për veprën penale “Mashtrim kompjuterik”, ndërsa Redion Rexhmati akuzohet për “Përkrahja e autorit të krimit”. Hetimet kanë zbuluar se Pepnika dhe Hitaj ishin shpallur në kërkim që prej muajit prill, pasi ndaj tyre ishte caktuar më herët masa e sigurisë “Arrest në burg” nga Gjykata e Tiranës për të njëjtën çështje.
Operacioni i arrestimit u zhvillua në një vilë në Drimadhë, ku gjatë kontrollit, autoritetet gjetën dhe sekuestruan një pistoletë dhe një sasi të dyshuar si lëndë narkotike e llojit cannabis sativa. Përveç këtyre provave, autoritetet vijojnë hetimet për dokumentimin e plotë të veprimtarisë kriminale në fushën e qendrave telefonike (call center), skemë e cila dyshohet se ka gjeneruar përfitime të paligjshme deri në 50 milionë euro.