Pas një hetimi dyvjeçar, strukturat e Drejtorisë për Hetimin e Krimit Kibernetik në Policinë e Shtetit, nën drejtimin e Prokurorisë së Tiranës, finalizuan operacionin e koduar “Ghost Call”. Hetimet, të cilat nisën pas një kërkese për informacion nga autoritetet austriake, zbuluan se tre subjekte call center-ash në Tiranë ushtronin veprimtari të paligjshme të mashtrimit kompjuterik ndaj qytetarëve në Evropë, SHBA dhe Kanada.
Sipas vendimit nr. 3410 të datës 13.04.2026, Gjykata e Tiranës autorizoi kontrolle në tre subjekte dhe në nëntë banesa. Gjatë këtij aksioni, u sekuestruan 891,735 euro, 443 kompjuterë, 238 celularë, 6 laptopë, si dhe pajisje të tjera teknologjike (HDD, DVR).
Masat e ndërmarra ndaj të dyshuarve janë si vijon:
- Janë ekzekutuar 5 masa sigurie “Arrest me burg” për shtetasit: E. D., M. H., T. A., L. T. dhe Xh. M..
- Janë arrestuar në flagrancë 5 shtetas: Kristjan Buda, Benard Biba, Kleidi Dyrma, Ema Taip dhe Eno Hana.
- Janë shpallur në kërkim 4 persona: Xh. H., M. L., L. C. dhe D. J..
- Për shtetasen A. V. u ekzekutua masa “Ndalimi për të dalë jashtë shtetit” dhe “Detyrim për t’u paraqitur”.
Autoritetet bënë me dije se hetimet vijojnë për dokumentimin e plotë të rrjetit kriminal dhe identifikimin e personave të tjerë të përfshirë në këtë skemë mashtrimi.