Operacioni i zhvilluar këtë të hënë në zonën e Liqenit të Thatë në Tiranë erdhi si rezultat i vendimeve të lëshuara nga prokurorja e Tiranës, Rovena Zoto. Kontrollet në dy subjektet e dyshuara për ushtrim të aktivitetit të paligjshëm përfaqësojnë vijimin e hetimeve të nisura më herët, ku përfshihen emrat e shtetasve Eduart Dalla, Mateo Hoxha, Tedi Agastra, Ledio Toçi, Ledio Cenaj, Aida Vokli dhe Xhoel Mekolli.
Sipas të dhënave, ambientet e kontrolluara kishin qenë më parë në fokus të autoriteteve, por ishin riaktivizuar pas goditjes së parë në muajin prill. Gjatë aksionit, në ambientet e zyrave janë gjetur pajisje kompjuterike që përdoreshin për aktivitetin e dyshuar.
Skema e mashtrimit, sipas hetimeve, bazohej në platforma të rreme investimesh dhe manipulime telefonike që synonin zhvatjen e parave nga qytetarët e Bashkimit Europian, kryesisht në Austri dhe Gjermani. Pritet që Policia e Shtetit dhe Prokuroria e Tiranës të dalin me një njoftim zyrtar për të konfirmuar rezultatet e plota të operacionit dhe masat e ndërmarra.
Përditësime
Në kuadër të një operacioni kundër qendrave të paligjshme të 'call center' në Tiranë, Policia dhe Prokuroria kanë arrestuar 7 persona: 4 shqiptarë, 1 shtetas paraguajan dhe 2 shtetas angolanë. Gjithashtu, autoritetet kanë nisur hetimin në gjendje të lirë për 27 shtetas të tjerë, me kombësi braziliane dhe franceze. Gjatë kontrolleve u sekuestruan 70 kompjuterë dhe 49 celularë. Të dyshuarit akuzohen për mashtrim kompjuterik, punësim të paligjshëm dhe fshehje të ardhurash.