Specialistët e Sektorit për Hetimin e Krimit Ekonomik dhe Financiar në Drejtorinë Vendore të Policisë Tiranë organizuan dhe finalizuan operacionin policor “Fasada”. Gjatë operacionit, shërbimet e policisë ndërhynë në një apartament në rrugën Sulejman Delvina në Tiranë, të cilin e kishin përshtatur si call center.
Në flagrancë u kapën dy administratorët Argest Rushi, 44 vjeç, dhe Leonard Maksutaj, 26 vjeç, si dhe 12 operatorë. Të arrestuarit administronin ambientin, të cilin e kishin marrë me qira për të mashtruar shtetas të huaj duke i bindur të investonin në bursa fiktive. Operatorët u proceduan penalisht në gjendje të lirë.
Nga hetimet paraprake rezulton se apartamenti përdorej për veprimtari të kundërligjshme kriminale. Si provë materiale u sekuestruan 19 njësi kompjuterike, 2 aparate celularë dhe 1 DVR, të cilat dyshohet se shërbenin për realizimin e mashtrimeve.
Materialet procedurale iu kaluan Prokurorisë për veprime të mëtejshme. Hetimet vijojnë në bashkëpunim me Prokurorinë për dokumentimin e plotë të veprimtarisë dhe identifikimin e personave të tjerë të përfshirë.