Prokuroria e Tiranës dhe Policia e kryeqytetit zhvilluan mbrëmjen e 13 prillit 2026 një operacion në tre call center në Tiranë. Aksioni, i drejtuar nga prokurorja Rovena Zoto, rezultoi me vendosjen e 9 masave të sigurisë dhe ndalimin e katër personave, midis të cilëve Eduart Dalla, Tedi Agastra dhe Mateo Hoxha.
Kontrollet u kryen në katër ambiente pune me rreth 300 poste pune në total. Dy nga ambientet ndodhen në Millennium Business Center në Rrugën e Kavajës, ndërsa një tjetër pranë kopshtit zoologjik.
Gjatë operacionit u sekuestruan rreth 1 milion euro cash, të dyshuara si të ardhura nga aktiviteti kriminal, si dhe dhjetëra pajisje elektronike. Policia shoqëroi disa persona dhe mori në pyetje mbi 60 punonjës.
Dyshohet se nga këto struktura janë mashtruar shtetas nga Austria, Italia, Spanja, Greqia, Kanadaja dhe SHBA përmes skemash telefonike. Hetimi nisi rreth dy vite më parë me referime nga Austria dhe Gjermania, dhe përfshin edhe shtetas gjermanë e austriakë. Prokuroria vazhdon zbardhjen e plotë të skemës dhe roleve të të përfshirëve.
Përditësime
Policia e Shtetit ka publikuar listën e plotë të 7 personave të arrestuar: Eduart Dalla, Mateo Hoxha, Tedi Agastra, Ledio Toçi, Xhoel Mekollo, Marsel Lami dhe Xhoji Hitaj.
Dy të tjerë u ndaluan të largohen nga vendi: Aida Vokli dhe Ledjon Cenaj.
Mateo Hoxha dhe Tedi Agastra dyshohen për konvertimin e parave në kriptomonedha.
- Dëm ekonomik mbi 50 milionë euro nga mashtrimet.
- Shoqëruar rreth 80 operatorë.
- Sekuestruar mbi 800 mijë euro në para cash.
- Zbuluar baza të tjera call center-ash nën hetim.
- Dyshime për dekonspirim dhe zhvendosje provash në Mapo.
Policia e Shtetit raporton arrestimin e 10 personave në total, nga 7 të arrestuar dhe 2 të ndaluar më herët.
Granit Pepnika nga Tropoja dyshohet si udhëheqës i skemës së call center-ave, duke kontrolluar 3 call center dhe një rrjet më të gjerë. Autoritetet presin urdhër-arrest për të.
Tedi Agastra ka qenë nën hetim në 2024 për mashtrime me kriptovaluta (u arrestuan 17 persona) dhe është pronar i një kompanie konsulence ekonomike.