Strukturat e Policisë së Shtetit, në bashkëpunim me Prokurorinë pranë Gjykatës së Shkallës së Parë të Juridiksionit të Përgjithshëm Tiranë, kanë finalizuar operacionin e koduar "End Point". Ky aksion i koordinuar mes Drejtorisë për Hetimin e Krimit Kibernetik dhe Drejtorisë për Hetimin e Krimit Ekonomik ka goditur një skemë mashtrimi kompjuterik që operonte përmes subjekteve call center.
Në pranga kanë rënë 7 persona, të cilët janë identifikuar nga policia si shtetasit Z. A. (36 vjeç), E. N. (31 vjeç), A. Sh. (28 vjeç), B. K. (30 vjeç), L. R. M. (41 vjeç), J. I. C. (28 vjeç) dhe S. L. S. (28 vjeç). Grupi përbëhet nga katër shqiptarë, një shtetas nga Paraguai dhe dy shtetas nga Angola. Ndërkohë, procedimi penal në gjendje të lirë ka nisur për 27 persona të tjerë, mes të cilëve përfshihen edhe 3 shtetas të huaj nga Brazili dhe Franca. Aksioni u bazua në vendimin nr. 4271, të datës 15 qershor 2026, të lëshuar nga Gjykata e Tiranës.
Sipas hetimeve, të dyshuarit akuzohen për veprat penale:
• "Mashtrimi kompjuterik"
• "Punësimi i paligjshëm"
• "Fshehja e të ardhurave"
Nga kontrollet në ambientet e përshtatura për këtë aktivitet, policia ka sekuestruar pajisje teknologjike, duke përfshirë 70 njësi kompjuterike dhe 49 telefona celularë, si dhe një sasi eurosh të dyshuara si përfitime nga veprimtaria kriminale. Policia vijon hetimet për dokumentimin e plotë të këtij aktiviteti dhe identifikimin e personave të tjerë të mundshëm të përfshirë.
Përditësime
Policia e Shtetit bëri publike gjeneralitetet e 7 shtetasve të arrestuar gjatë operacionit "End Point" për mashtrim kompjuterik.
Policia e Shtetit ka bërë publike identitetet e 5 personave të arrestuar gjatë operacionit të koduar "End Point", të cilët dyshohen për përfshirje në një skemë mashtrimi përmes call center-ave.
Dy drejtori të Policisë së Shtetit, ajo për Hetimin e Krimit Kibernetik dhe ajo për Hetimin e Krimit Ekonomik, finalizuan operacionin 'End Point' dy ditë më parë.