Ministrja e Arsimit, Mirela Kumbaro, konfirmoi se procesi i hartimit të tezës për provimin e Gjuhës Shqipe dhe Letërsisë ka përfunduar dhe materialet janë shpërndarë në të gjithë vendin me mbështetjen e Postës Shqiptare dhe Policisë së Shtetit. Ky provim, që konsiderohet një ndër më sfiduesit për shkak të analizave letrare dhe detyrave gjuhësore, do të monitorohet nga 170 punonjës të Ministrisë, ndërsa procesin do ta administrojnë rreth 2 mijë mësues.
Sipas zv.ministres së Arsimit, Orjana Osmani, 20% e testit do të jetë e nivelit të vështirë, me qëllim diferencimin e nxënësve më të mirë. Ministrja Kumbaro theksoi rëndësinë e respektimit të rregullores, duke bërë me dije se do të ketë masa ndëshkuese jo vetëm për nxënësit që tentojnë të përdorin pajisje të ndaluara, por edhe për administratorët që lejojnë shkelje të tilla.
Kjo deklaratë pason masat e ndërmarra në provimin e kaluar, ku u raportua përjashtimi i dy maturantëve për shkak të përdorimit të celularëve. Drejtuesit e institucioneve arsimore kanë kërkuar angazhim maksimal nga të gjitha strukturat për të garantuar standardet e testimit në 144 qendrat e hapura në nivel kombëtar.