Sot, në mbarë vendin, maturantët po zhvillojnë provimin e dytë të Maturës Shtetërore 2026, atë të Gjuhës Shqipe dhe Letërsisë. Testimi, i cili nisi në orën 10:00, ka një kohëzgjatje prej 2 orë e 30 minuta dhe përfundon në orën 12:30. Procesi mbështetet nga 2.087 mësues administratorë dhe 170 monitorues, ndërsa 650 vlerësues janë angazhuar për korrigjimin e testeve.
Rregullat e testimit
Ministria e Arsimit ka vendosur kritere strikte për mbarëvajtjen e procesit:
• Maturantët duhet të paraqiten në qendrat e testimit në orën 08:30.
• Paraqitja me dokument identifikimi (kartë identiteti ose pasaportë) është e detyrueshme.
• Ndalohet rreptësisht përdorimi i telefonave celularë, orëve inteligjente (smart watch) dhe çdo pajisjeje që mundëson komunikim elektronik ose lidhet me inteligjencën artificiale.
• Çdo tentativë për kopjim, komunikim mes maturantëve ose përdorim i materialeve të paautorizuara sjell përjashtimin e menjëhershëm nga provimi.
• Rekomandohet veshja me uniformën e shkollës.
Kalendari i provimeve
Pas provimit të sotëm, kalendari i Maturës Shtetërore vijon me datat e tjera:
• 16 qershor: Provimi i Matematikës.
• 23 qershor: Provimi me zgjedhje.
Kujtojmë se provimi i parë, ai i Gjuhës së Huaj, u zhvillua më 3 qershor.
Përditësime
Provimi i Gjuhës Shqipe dhe Letërsisë është shoqëruar me ankesa të maturantëve lidhur me vështirësinë e testit dhe mbizotërimin e pyetjeve me natyrë subjektive. Ndërkohë, Ministria e Arsimit dhe Sportit konfirmoi përjashtimin e një maturanti në Qarkun e Kukësit, për shkak të publikimit të tezës në rrjetet sociale rreth 20-30 minuta pas fillimit të provimit. Autoritetet siguruan se ky incident nuk cenon integritetin e procesit të testimit.