Sot, më 20 qershor 2026, po zhvillohet afati i parë i Testit të Maturës Shtetërore. Testimi ka nisur në orën 10:00 dhe do të përfundojë në orën 12:30 për të gjithë kandidatët.
Ministria e Arsimit, Shkencës, Teknologjisë dhe Inovacionit (MAShTI) ka njoftuar se maturantët janë udhëzuar të paraqiten në qendrat përkatëse më së voni deri në orën 09:00, për t'i përfunduar procedurat e identifikimit dhe sistemimit. Testi përfshin gjithsej 100 kërkesa, ku secila nga katër lëndët — gjuha amtare, gjuha angleze, matematika dhe lënda zgjedhore — përmban nga 25 pyetje.
Autoritetet arsimore kanë zbatuar rregulla strikte për mbarëvajtjen e procesit. Është ndaluar rreptësisht posedimi i telefonave mobilë dhe i çdo pajisjeje tjetër elektronike brenda sallave të testimit. Sipas njoftimit zyrtar, çdo kandidat që konstatohet me një pajisje të tillë do të përjashtohet menjëherë nga procesi, pavarësisht nëse e ka përdorur apo jo.
Qendra për Vlerësim ka konfirmuar përfundimin e të gjitha përgatitjeve logjistike, ndërsa personeli i angazhuar është trajnuar dhe pajisur me udhëzimet e nevojshme paraprake.
Përditësime
Autoritetet arsimore konfirmuan përfundimin e Testit të Maturës Shtetërore 2026, proces të cilit iu nënshtruan mbi 19 mijë maturantë. Gjatë testimit, u konstatua shpërndarja e pyetjeve dhe përgjigjeve përmes rrjetit social Viber. Hetimet identifikuan dy grupe kryesore me 9,830 dhe 500 anëtarë, ku nxënësit shkëmbyen informacione konfidenciale lidhur me testin.