Mazniku: Reforma territoriale nuk synon ndikim elektoral

Bashkëkryetari i Komisionit të Posaçëm për Reformën Administrativo-Territoriale, Arbjan Mazniku, hodhi poshtë pretendimet se harta e re territoriale është konceptuar me synime elektorale. Në një intervistë për emisionin “Top Story”, ai u shpreh se bashkimi i disa njësive vendore, siç është rasti i Vlorës dhe Selenicës, synon krijimin e kushteve për një zhvillim më të madh ekonomik, dhe jo ndryshimin e raporteve politike në nivel bashkie. Lidhur me situatën në Korçë, Mazniku siguroi se Partia Socialiste nuk përballet me rreziqe elektorale, duke përmendur gjithashtu qëndrueshmërinë e votës në zonën e Maliqit. Ai vlerësoi se ndryshimet territoriale nuk prekin funksionimin e përditshëm të shërbimeve, pasi godinat administrative do të mbeten në vendndodhjet e tyre aktuale. Sa i përket Kavajës, Mazniku pranoi se është i vetmi rast ku mund të diskutohet për ndikim politik, megjithatë theksoi se drejtimi i bashkisë varet nga faktorë të tjerë dhe jo nga riorganizimi territorial. Aktualisht, projektligji për reformën territoriale është në proces diskutimi në Kuvend.