Procesi i votimit në përfaqësitë diplomatike të Republikës së Kosovës për zgjedhjet e 7 qershorit po zhvillohet pa pengesa në 47 vendvotime, të shpërndara në 17 ambasada dhe 13 konsullata në 18 shtete të ndryshme.
Sipas Komisionit Qendror të Zgjedhjeve (KQZ), deri në orën 13:00, shkalla e pjesëmarrjes ka arritur në 38.97%, me gjithsej 10,804 votues që kanë ushtruar të drejtën e tyre nga lista prej 27,724 votuesish të regjistruar. Zëdhënësi i KQZ-së, Valmir Elezi, njoftoi se votimi është aktiv në të gjitha misionet diplomatike, pas hapjes së vendvotimeve edhe në Shtetet e Bashkuara të Amerikës dhe Kanada.
Në Ambasadën e Kosovës në Austri, procesi po vijon në mënyrë të rregullt. Sipas të dhënave zyrtare, deri në orën 13:00, në këtë qendër kanë votuar 417 qytetarë nga 1,126 votues të regjistruar. Autoritetet diplomatike kanë falënderuar bashkatdhetarët për angazhimin dhe pjesëmarrjen e tyre në këtë proces zgjedhor.