Sot, më 29 gusht 2026, në të gjithë Kosovën zhvillohet Provimi i Maturës. Sipas të dhënave zyrtare nga Ministria e Arsimit dhe Shkencës, përmes platformës eKosova kishin aplikuar gjithsej 5,033 maturantë, nga të cilët pas procesit të shqyrtimit dhe verifikimit, janë aprovuar 4,967 aplikime për testimin e këtij afati.
Provimi ka nisur në orën 10:00 dhe procesi është duke u zhvilluar në 55 qendra të testimit të përcaktuara në të gjithë vendin. Për të garantuar mbarëvajtjen e rregullt të provimit, ministria ka udhëzuar që të gjithë komisionarët dhe administruesit e angazhuar të jenë të pranishëm në qendrat përkatëse një orë përpara fillimit të procesit.
Kandidatët janë njoftuar se duhet të paraqiten në qendrën e testimit që është specifikuar në listat përfundimtare, duke mbajtur me vete dokumentin e vlefshëm të identifikimit. Ministria e Arsimit dhe Shkencës ka kërkuar respektimin e plotë të rregullave dhe udhëzimeve për administrimin e provimit, me synim sigurimin e një procesi të barabartë dhe të sigurt për të gjithë pjesëmarrësit.
Përditësime
Administruesit e Provimit të Maturës përjashtuan 18 kandidatë për shkak të përdorimit të telefonit gjatë procesit. Ndërkohë, një pyetje në test lidhur me vendimin e Gjykatës Kushtetuese për zgjedhjen e Nenad Rashiqit si nënkryetar i Kuvendit ka nxitur debate publike. Ministria e Arsimit dhe Shkencës nuk ka dalë ende me një sqarim zyrtar për përmbajtjen e kësaj pyetjeje.