Mbrojtësi i krahut, Albion Pllana, ka ndryshuar ambient duke u bërë pjesë e kampionatit të Maltës. 25-vjeçari është prezantuar zyrtarisht nga skuadra Gzira United, pasi mbylli aventurën e tij te klubi kosovar Dukagjini.
Në njoftimin e tyre zyrtar, Gzira United shprehu besim te aftësitë e futbollistit kosovar, duke theksuar se ai njihet për shpejtësinë, disiplinën mbrojtëse dhe kontributin në fazën sulmuese. Sipas të dhënave të platformës Transfermarkt, marrëveshja mes palëve është e vlefshme për një periudhë njëvjeçare.
Albion Pllana është zhvilluar si futbollist te skuadra e Trepçës ’89 në Mitrovicë, ndërsa gjatë karrierës së tij ka përfaqësuar edhe kombëtaren e Kosovës U21. Skuadra e tij e re, Gzira United, e mbylli kampionatin e kaluar në vendin e gjashtë në renditjen e kampionatit maltez.