Autoritetet e rendit, në bashkëpunim me Inspektoratin Shëndetësor dhe Inspektoratin Farmaceutik, kanë ndërprerë aktivitetin në një objekt në Obiliq, ku dyshohet se ushtrohej veprimtari mjekësore pa licencën përkatëse nga Ministria e Shëndetësisë. Pas verifikimeve në vendngjarje, inspektorët kanë vendosur vulën zyrtare për ndalimin e veprimtarisë në këtë hapësirë.
Në lidhje me këtë rast, janë iniciuar veprat penale "Ushtrim i kundërligjshëm i veprimtarisë mjekësore" dhe "Prodhim dhe shpërndarje e produkteve të dëmshme mjekësore". Dy persona, një burrë dhe një grua, janë intervistuar nga Policia e Kosovës në cilësinë e të dyshuarve. Pas konsultimit me prokurorin e çështjes, ata janë liruar në procedurë të rregullt, ndërkohë që hetimet për zbardhjen e rrethanave vazhdojnë.
Gjatë kontrollit të hapësirave, përveç pajisjeve mjekësore, autoritetet kanë gjetur edhe disa pjesë të vjetruara të uniformës së Policisë së Kosovës. Objekti mbetet nën masat kufizuese të vendosura nga institucionet përkatëse.