Policia e Kosovës ka arrestuar dy mashkuj kosovarë të dyshuar për veprën penale "Keqpërdorim i pozitës apo autoritetit zyrtar", pas hetimeve të zhvilluara nga Drejtoria për Hetimin e Krimeve Ekonomike dhe Korrupsionit (DHKEK) në Gjilan, në koordinim me prokurorinë kompetente.
Njëri nga të dyshuarit, i punësuar si bibliotekist në një shkollë me kontratë pune për kohë të pacaktuar, nuk është paraqitur në vendin e punës për një periudhë të gjatë, ndërkohë që ka vazhduar të përfitojë paga mujore nga buxheti i Republikës së Kosovës. Hetimet kanë konstatuar se nga viti 2023 deri në tetor të vitit 2025, ai ka shkaktuar dëm financiar në vlerë prej 19,067.69 euro.
I dyshuari i dytë, në cilësinë e personit zyrtar, nuk ka raportuar mungesën e bibliotekistit pranë autoriteteve përkatëse, duke mundësuar vazhdimin e pagesave pa bazë ligjore. Kjo veprimtari përbën të njëjtën vepër penale.
Të dy të dyshuarit janë intervistuar në prani të avokatëve mbrojtës dhe, me vendim të prokurorit, janë ndaluar për 48 orë. Hetimet vazhdojnë.