Ministria e Infrastrukturës dhe Transportit ka njoftuar se segmenti rrugor Brezovicë-Prevallë (R115) do të mbyllet përkohësisht për të mundësuar zhvillimin e Garës Automobilistike Malore "Brezovica 2026".
Sipas njoftimit zyrtar, kufizimi i qarkullimit do të jetë në fuqi gjatë datave 18 dhe 19 korrik 2026, në intervalin kohor nga ora 10:30 deri në 18:00.
Programi i garës parashikon:
- 18 korrik 2026: Zhvillimi i stërvitjeve zyrtare.
- 19 korrik 2026: Zhvillimi i garës zyrtare.
Organizatorët, në bashkëpunim me Policinë e Kosovës dhe institucionet përgjegjëse, kanë kërkuar nga qytetarët dhe pjesëmarrësit në trafik që t'i planifikojnë lëvizjet e tyre duke marrë parasysh këtë njoftim. Po ashtu, drejtuesit e automjeteve udhëzohen të respektojnë sinjalizimin e përkohshëm rrugor dhe udhëzimet e autoriteteve të pranishme në terren për të garantuar sigurinë dhe mbarëvajtjen e këtij aktiviteti sportiv.