Kryetari i Aleancës për Ardhmërinë e Kosovës (AAK), Ardian Gjini, ka reaguar lidhur me pezullimin e veprimtarisë së qumështores Vita për një periudhë prej 7 ditësh. Përmes një deklarate publike, Gjini vlerësoi se mbyllja e këtij subjekti përbën një goditje ndaj prodhimit vendor.
Sipas Gjinit, ky veprim i institucioneve po krijon terren për produktet e importuara nga Serbia në raftet e marketeve. Ai theksoi se pasojat e këtij vendimi ndikojnë drejtpërdrejt te qindra punëtorë dhe mijëra fermerë që bashkëpunojnë me këtë qumështore.
Lidhur me arsyetimin për kontrollet e cilësisë, Gjini shprehu rezerva të forta, duke argumentuar se monitorimi i ushqimit duhet të jetë proces i vazhdueshëm. Ai kritikoi praktikën e inspektimeve pas një periudhe 6-vjeçare, duke i cilësuar ato si veprime të motivuara politikisht që shkaktojnë pasiguri në treg. Kryetari i Gjakovës u bëri thirrje institucioneve shtetërore që të sqarojnë rastin dhe të gjejnë një zgjidhje të shpejtë për rifillimin e punës në ndërmarrje.