Pas aksionit të zhvilluar nga inspektorati në ambientet e qumështores "Vita", zyrtari i PDK-së, Arben Mustafa, ka reaguar përmes një njoftimi publik. Ai e vlerësoi këtë veprim si dëshmi të një lufte të hapur që Qeveria e Kosovës po zhvillon kundër sektorit privat dhe prodhuesve vendorë.
Në reagimin e tij, Mustafa adresoi akuza të drejtpërdrejta ndaj deputetit të Lëvizjes Vetëvendosje, Armend Muja, të cilin e cilësoi si "inspektor", duke pretenduar se veprimet e tij po i çojnë prodhuesit vendorë drejt mbylljes. Sipas Mustafës, ky represion dërgon mesazh negativ për të gjithë investitorët, qofshin ata vendorë apo të huaj.
Mustafa vlerësoi se politikat ekonomike të qeverisë së kryeministrit Albin Kurti nuk synojnë zhvillimin ekonomik apo krijimin e kushteve për jetë me dinjitet. Përkundrazi, ai pretendon se po ndërtohet një model ekonomik që rrit varësinë e qytetarëve nga ndihmat shtetërore, në vend që të stimulohet prodhimi dhe investimet.