Pas procesit të identifikimit me anë të analizës shkencore të ADN-së dhe kërkesës së familjes, Komisioni Qeveritar për Persona të Zhdukur njoftoi se më 21 qershor 2026 do të kryhet rivarrimi i mbetjeve mortore të dëshmorit Hajdar Pepaj. Ai ishte pjesë e listës së personave të zhdukur gjatë luftës në Kosovë.
Ceremonia përkujtimore do të përfshijë homazhe te 'Lapidari i Ri' në fshatin Kodrali të Deçanit, duke filluar nga ora 15:00. Rivarrimi do të vijojë në varrezat e fshatit në orën 16:00. Aktivitetet organizohen nga Shoqatat e dala nga lufta – Dega në Deçan dhe Komuna e Deçanit, me mbështetjen e Komisionit Qeveritar për Persona të Zhdukur.
Institucioni përkatës shprehu ngushëllime për familjen Pepaj dhe ritheksoi angazhimin për zbardhjen e fatit dhe gjetjen e vendndodhjes së të gjithë personave të zhdukur me forcë gjatë periudhës së luftës.