Media italiane Idealista ka publikuar një artikull dedikuar Beratit, të njohur si “qyteti i një mbi një dritareve”, duke vënë theksin te vlerat e tij historike, arkitekturore dhe kulturore. Qyteti, i cili është pjesë e listës së trashëgimisë botërore të UNESCO-s, vlerësohet për ruajtjen e urbanistikës së periudhës osmane dhe për modelin e bashkëjetesës fetare.
Sipas artikullit, identiteti i Beratit është ngushtësisht i lidhur me lumin Osum, përgjatë brigjeve të të cilit është shtrirë qyteti. Shtëpitë karakteristike, të ndërtuara në shpatin e kodrës me fasada të bardha dhe dritare prej druri, krijojnë një panoramë vizuale që pasqyrohet në rrjedhën e lumit. Kjo arkitekturë, përveç vlerave estetike, vlerësohet edhe për funksionalitetin dhe ndjenjën e fortë të komunitetit që ofron.
Vizitorëve u sugjerohet që ta zbulojnë qytetin përmes shëtitjeve nëpër rrugicat me kalldrëm dhe lagjet historike. Ndër simbolet kryesore të qytetit përmendet Ura e Goricës, e ndërtuar prej guri, e cila shërben si pikë lidhëse midis dy brigjeve të lumit Osum.