Shumë shpejt pasi u përhap lajmi për vrasjen e udhëheqësit suprem iranian Ali Khamenei në sulmet izraelito-amerikane, më 1 mars në adresat elektronike të mediave në Sarajevë mbërriti një mesazh nga IRIB, shërbimi shtetëror mediatik i Iranit.
IRIB është nën sanksione nga Bashkimi Evropian, Shtetet e Bashkuara dhe Kanadaja për akuzat e përhapjes së propagandës dhe shkeljeve të të drejtave të njeriut. Në email ofroheshin video-materiale nga ajo që përshkruhej si “mbledhje spontane masive të qytetarëve në pjesë të ndryshme” pas vrasjes së Khameneit, i cili kishte qenë në krye të vendit për gati 40 vjet.
Një situatë e ngjashme ndodhi rreth një muaj më parë. Ndërsa forcat qeveritare iranianë vrisnin mijëra njerëz gjatë protestave kundër regjimit në qytete të Iranit, IRIB dërgoi mediave në Bosnje materiale nga tubime proqeveritare, të organizuara si përgjigje ndaj trazirave për gjendjen ekonomike.
Më 14 janar, një raport i Ministrisë së Jashtme të Iranit, i dërguar mediave në Bosnje dhe Hercegovinë, përmbante fotografi të “veprimeve të dhunshme dhe terroriste të protestuesve” nga dhjetori 2025 deri në janar 2026. Në raport, protestuesit krahasoheshin me militantët e grupit terrorist Shteti Islamik, ndërsa Shtetet e Bashkuara dhe vende perëndimore paraqiteshin si nxitëse të protestave.
Protestat shpërthyen në fund të dhjetorit 2025 për probleme ekonomike dhe zgjatën disa javë, duke u shndërruar në kërcënimin më të madh për Republikën Islamike në vite. Sipas organizatave për të drejtat e njeriut, autoritetet vranë në janar së paku 7.000 persona gjatë shtypjes, ku kërkohej fundi i sundimit të elitave fetare dhe politike. Besohet se numri real i viktimave është më i lartë.
Përditësime
Radios Evropa e Lirë analizoi se njoftimet e IRIB-it nuk u transmetuan gjerësisht në platformat online të mediave në Bosnje dhe Hercegovinë.
Meisam Mirhadi, përfaqësues i IRIB-it, refuzoi të i përgjigjej REL-it për mediat që morën materialet.