Protestat që po zhvillohen prej 31 ditësh në Tiranë kanë tërhequr vëmendjen e gazetës zvicerane Aargauer Zeitung, e cila ka analizuar shkaqet dhe zhvillimin e kësaj lëvizjeje. Qytetarët mblidhen çdo mbrëmje për të kundërshtuar një projekt luksoz që parashikon ndërtimin e hoteleve, apartamenteve, vilave dhe një marine për jahte në ishullin e Sazanit dhe në zonën bregdetare pranë Lagunës së Nartës.
Sipas analizës, pjesëmarrësit në këto protesta nuk i përkasin një force politike të caktuar, megjithatë shumica e tyre kërkojnë dorëheqjen e kryeministrit Edi Rama. Pika kryesore e kundërshtimit lidhet me ndikimin mjedisor të këtij investimi, pasi zona gëzon statusin e mbrojtjes natyrore dhe shërben si habitat për specie të ndryshme, përfshirë flamingot.
Lëvizja është identifikuar në mediat ndërkombëtare si "Revolucioni i Flamingove", për shkak të figurave prej shkume që protestuesit mbajnë gjatë marshimeve. Një nga kontribueset në këtë lëvizje është artistja Fatma Paja, e cila realizon me dorë këto figura simbolike. Ambientalistët paralajmërojnë se projekti do të shkaktonte dëme të pakthyeshme në një ekosistem unik, ndërsa protestuesit denoncojnë mungesën e transparencës mbi zhvillimin e këtij investimi, në të cilin është e përfshirë kompania e Jared Kushner, dhëndrit të Donald Trump.