Mbrojtësi 31-vjeçar, Mërgim Vojvoda, është pranë një lëvizjeje në kampionatin italian të Serie A, pasi Udinese ka siguruar marrëveshjen me Como-n për kartonin e lojtarit. Sipas raportimeve të gazetarit Gianluigi Longari nga Sportitalia, propozimi i klubit friulan është miratuar zyrtarisht nga drejtuesit e Como-s.
Detajet financiare të operacionit, të bëra të ditura nga Sky Sport Italia, konfirmojnë një ofertë prej 1.3 milionë eurosh, të shoqëruar me 300 mijë euro bonuse. Në garë për shërbimet e anësorit të djathtë kishin qenë edhe skuadra të tjera italiane, si Cagliari, Venezia dhe Monza, por Udinese ka arritur të sigurojë një avantazh vendimtar.
Mërgim Vojvoda, i cili u transferua te Como në shkurt të vitit 2025 nga Torino, ka një kontratë të vlefshme deri në vitin 2028. Gjatë sezonit të kaluar, mbrojtësi regjistroi 34 paraqitje në Serie A dhe Coppa Italia, duke realizuar dy gola dhe tri asistime. Ai shquhet për shkathtësinë e tij, duke qenë në gjendje të luajë si qendërmbrojtës në skemat me tre lojtarë, në të dy krahët e prapavijës, apo edhe në role më të avancuara. Pas dakordësimit mes klubeve, hapi i radhës përfshin bisedimet mes Udinese-s dhe përfaqësuesve të lojtarit për përcaktimin e kushteve personale të kontratës.
Përditësime
Mërgim Vojvoda është pranë transferimit te Udinese, pasi ka arritur marrëveshjen për një kontratë 2-vjeçare, me opsion rinovimi për një sezon shtesë. Kjo lëvizje nga Como shënon aventurën e tretë të mbrojtësit në Serie A.