Mbrojtësi Mërgim Vojvoda ka nisur një kapitull të ri në karrierën e tij profesionale në futbollin italian, duke u bërë zyrtarisht pjesë e klubit Udinese. Transferimi i 30-vjeçarit është kryer nga ekipi i Como gjatë këtij afati kalimtar të verës.
Gjatë prezantimit të tij, Vojvoda theksoi se synimi i tij kryesor është të shpërblejë besimin e klubit përmes përkushtimit dhe paraqitjeve të mira në fushë. Futbollisti vlerësoi potencialin e Udineses, duke e cilësuar atë si një klub të madh dhe ambicioz, veçanërisht në vitin jubilar të 130-vjetorit të themelimit të tij.
“Jemi ende në fillim të rrugëtimit dhe po punojmë fort për të ndërtuar bazat e sezonit. Do ta marrim çdo ndeshje me radhë dhe më pas do të shohim deri ku mund të arrijmë”, u shpreh Vojvoda. Në lidhje me rolin e tij në fushën e lojës, mbrojtësi konfirmoi gatishmërinë e tij për të luajtur në çdo pozicion që do t'i kërkohet nga trajneri, duke vënë theksin te dëshira për të fituar dhe për të ndihmuar skuadrën në arritjen e sukseseve të përbashkëta.