Klubi i Udinese ka ndërmarrë hapat e parë për të siguruar shërbimet e mbrojtësit të Kombëtares së Kosovës, Mërgim Vojvoda. Sipas raportimeve të gazetarit Gianluca Di Marzio për Sky Sport, oferta zyrtare e dërguar në drejtim të skuadrës së Comos është në vlerën e 1 milion eurove.
Megjithatë, ky propozim është cilësuar si i ulët nga drejtuesit e Comos, të cilët nuk kanë dhënë miratimin për këtë lëvizje. Në aspektin personal, Udinese i ka ofruar 31-vjeçarit një marrëveshje trevjeçare, me përfitime prej 1.1 milionë eurosh neto për sezon. Përveç këtij interesimi, raportohet se edhe skuadra e Cagliarit ka shfaqur interes për futbollistin.
Mërgim Vojvoda u transferua te Como nga Torino në vitin 2025 për shumën e 2 milionë eurove dhe ka një kontratë të vlefshme deri në verën e vitit 2028. Gjatë edicionit 2025/2026, ai regjistroi 34 paraqitje në të gjitha garat, duke kontribuar me dy gola dhe tri asistime.
Aktualisht, mbetet e paqartë nëse lojtari do të pranojë transferimin, pasi qëndrimi te Como i mundëson atij pjesëmarrjen në Ligën e Kampionëve, pas suksesit të skuadrës së drejtuar nga Cesc Fàbregas në sezonin e kaluar.