Gjatë ceremonisë përmbyllëse të procesit të rivlerësimit kalimtar të gjyqtarëve dhe prokurorëve, Inspektori i Lartë i Drejtësisë, Artur Metani, vlerësoi punën e organeve të rivlerësimit dhe të ONM-së. Sipas tij, ky proces ka mundësuar largimin nga sistemi të magjistratëve që nuk përmbushnin standardet e integritetit, duke e bërë drejtësinë sot dukshëm më cilësore krahasuar me periudhën para vitit 2016.
Metani nënvizoi se vetingu lindi si një imperativ kohor për të adresuar mosbesimin e publikut dhe perceptimin mbi korrupsionin. Tashmë, me përfundimin e këtij mekanizmi të jashtëzakonshëm, vëmendja zhvendoset te konsolidimi i qëndrueshëm i institucioneve.
Sipas Inspektorit të Lartë të Drejtësisë, sfida e ardhshme për sistemin nuk është më vetëm pastrimi nga figurat e papërshtatshme, por institucionalizimi i standardeve të larta të etikës dhe përgjegjshmërisë. Përfundimi i vetingut, shtoi ai, nuk duhet parë si fundi i reformës në drejtësi, por si momenti kur institucionet e reja të drejtësisë marrin përgjegjësinë e plotë për garantimin e profesionalizmit të magjistratëve në të ardhmen.