Në Tiranë, më 13 maj 2026, Inspektori i Lartë i Drejtësisë Artur Metani, i shoqëruar nga zëvendësinspektorja e Lartë e Drejtësisë Elena Pelushi, priti një përfaqësi të Shoqatës së Prokurorëve të Shqipërisë, të kryesuar nga prokurori Gëzim Spahiu.
Gëzim Spahiu e njohu Metanin me objektivat e shoqatës, e krijuar në dhjetor 2025, që synon të ofrojë një strukturë të qëndrueshme për trajtimin e çështjeve lidhur me statusin dhe funksionin e prokurorëve në Shqipëri.
Gjatë takimit u nënvizua rëndësia e pavarësisë së prokurorëve si shtyllë themelore e sundimit të ligjit dhe qeverisjes demokratike. Prokurorët duhet të ushtrojnë detyrat e tyre të lirë nga ndikimet e paligjshme, duke respektuar Kushtetutën dhe ligjet në fuqi.
Artur Metani theksoi se pavarësia duhet të shkojë paralelisht me përgjegjësinë, profesionalizmin, integritetin dhe llogaridhënien ndaj qytetarëve dhe institucioneve. “Prokurorët duhet të jenë të mbrojtur nga ndërhyrjet e padrejta, por njëkohësisht të mbajnë përgjegjësi për shkeljet profesionale ose etike. Vetëm përmes këtij ekuilibri mund të ndërtohet një sistem drejtësie i besueshëm, transparent dhe në shërbim të interesit publik”, deklaroi ai.
Palët diskutuan gjithashtu rritjen e besimit të publikut në drejtësi, që forcohet përmes hetimeve të paanshme, zbatimit të qëndrueshëm të ligjit, transparencës institucionale dhe komunikimit efektiv me qytetarët.
Të dyja palët ranë dakord për të vazhduar dialogun konstruktiv dhe bashkëpunimin për forcimin e sistemit të drejtësisë.