Në një reagim të publikuar së fundmi, regjisori dhe producenti i njohur Mevlan Shanaj ka ngritur shqetësimin mbi rolin e artistëve dhe intelektualëve në shoqëri, në një kohë kur vendi po përjeton prej 57 ditësh protesta kundër qeverisë së Edi Ramës. Shanaj thekson se mungesa e zërit kritik ndaj zhvillimeve publike dhe atyre të administratës shtetërore dëshmon për një konformizëm të shtrirë në kohë.
Sipas regjisorit, kritika në Shqipëri ka rendur shpesh pas pushtetit, në vend që të ecë përpara tij. Ai vë në dukje se kjo qasje ka sjellë një gjendje plogështie, ku synimi kryesor duket të jetë ruajtja e qetësisë së administratës, pavarësisht faktit se shumë veprime të saj janë larg interesit të qytetarit apo frymës bashkëkohore.
Shanaj kritikon gjithashtu mungesën e debatit profesional brenda komunitetit artistik, duke u shprehur i befasuar nga heshtja e artistëve edhe për realizimet e kolegëve të tyre. Ai shton se në rastet kur intelektualët vendosin të flasin, zëri i tyre shpesh është i ngarkuar me mllefe militantizmi, duke munguar gjykimi i pavarur dhe serioz. Në reflektimin e tij, i cili është pjesë e librit në proces të titulluar "Nuk është vonë të tregosh", ai vë theksin se heshtja nuk duhet të interpretohet gjithmonë si urtësi, por shpesh ajo shndërrohet në bashkëfajësi me atë çka shoqëria nuk guxon ta kundërshtojë.
Ai u bën thirrje artistëve dhe intelektualëve të shprehin hapur mendimin e tyre, duke hedhur poshtë indiferencën dhe frikën, me qëllim që të ndihen më të lirë dhe më të çliruar shpirtërisht. Për Shanajn, ky qëndrim është i domosdoshëm për ta çuar shoqërinë drejt një zhvillimi më të qytetëruar, larg modeleve të jetesës që, sipas tij, nuk ofrojnë mbrojtje dhe progres.