Kryeministri Edi Rama ka reaguar lidhur me situatën e krijuar rreth koncertit të këngëtarit Ylli Limani, duke e konsideruar dhunën verbale dhe kërcënimet në rrjetet sociale ndaj tij si shprehjen më të neveritshme të një fenomeni shqetësues. Sipas kryeministrit, ky reagim është pjesë e një dallge presioni dhe vulgariteti që po shoqëron protestën qytetare, e cila tashmë ka hyrë në ditën e saj të 14-të.
Në reagimin e tij, Rama denoncoi gjithashtu thirrjet për bllokim rrugësh dhe detyrimin e qytetarëve për t'iu bashkuar kauzës së protestuesve, duke i cilësuar këto veprime si intimiduese. Ai theksoi se, ndonëse protesta është një e drejtë demokratike, forma e ushtrimit të saj përmes kërcënimeve cenon lirinë e mendimit dhe jetën publike në vend.
Lidhur me kauzën që ka nxitur këto protesta, projektin e zhvillimit turistik në Zvërnec, kryeministri vlerësoi se histeria ndërkombëtare e rrjeteve sociale nuk pasqyron realitetin e Shqipërisë, por ushqehet nga kundërshtira ideologjike, duke përmendur këtu qëndrimet kundër Presidentit amerikan. Rama deklaroi se shumica qeverisëse e Partisë Socialiste vazhdon të ketë respekt për të drejtën e protestës, por distancohet nga sjelljet përjashtuese dhe dhuna në grup.