Drejtuesit e Lojërave Olimpike Dimërore Milan-Cortina 2026 kanë nisur një hetim të brendshëm pas raporteve për dëmtimin e menjëhershëm të medaljeve olimpike nga disa atletë fitues.
Breezy Johnson, medaliste e artë e SHBA-së në zbritjen e ski alpinit për femra, tregoi në konferencën për shtyp medaljen e saj të ndarë nga shiriti. Ajo u shpreh: «Ja ku është medalja. Dhe ja ku është shiriti», duke ekspozuar pjesën e thyer.
Alysa Liu, fituese e medaljes së artë në garën ekipore të patinazhit artistik për SHBA-në, postoi në rrjetet sociale një video ku shfaqej medalja e ndarë nga shiriti, me mbishkrimin: «Medalja ime nuk ka nevojë për shirit».
Probleme të ngjashme janë raportuar nga ekipi gjerman i biatlonit, fitues i medaljes së bronztë. Një video në Instagram tregon medaljen që bie nga shiriti gjatë festimeve në hotel.
Andrea Francisi, drejtor i operacioneve të Lojërave, deklaroi: «Jemi plotësisht të vetëdijshëm për situatën dhe po shqyrtojmë me kujdes se cili është problemi. Medaljet janë një nga momentet më të rëndësishme për atletët dhe do t’u kushtojmë vëmendje maksimale».
Një zëdhënës i Komitetit Olimpik dhe Paralimpik të SHBA-së konfirmoi për BBC Sport se po presin një zgjidhje nga organizatorët, ndërsa nuk është bërë e ditur ende nëse atletët do të marrin medalje zëvendësuese.
Kjo nuk është hera e parë që vihet në diskutim cilësia e medaljeve olimpike. Që nga shkurt i vitit 2025, janë paraqitur 220 kërkesa për zëvendësim të medaljeve të fituara në Lojërat e Paris 2024, për shkak të konsumimit dhe zbehjes, rreth 4% e totalit. Zhytësja britanike Yasmin Harper, fituese e medaljes së parë olimpike për ekipin e saj në Paris, raportoi shenja zbehjeje në medaljen e saj. Organizatorët e Paris 2024 konfirmuan se çdo medalje e dëmtuar do të zëvendësohet.
Përditësime
Milan-Cortina 2026 do të zëvendësojë të gjitha medaljet e dëmtuara pas përfundimit të hetimit.
- Medaljet u prodhuan nga Zecca dello Stato, më të shtrenjtat në histori.
- Problemi nuk lidhet me brishtësinë, por me dështimin e sistemit të sigurisë.