Milanoviq i quan marrëzira pretendimet se Kroacia, Shqipëria e Kosova sulmojnë Serbinë

Presidenti i Kroacisë, Zoran Milanoviq, ka deklaruar se pretendimet se Kroacia, Shqipëria dhe Kosova po përgatiten ta sulmojnë Serbinë janë “marrëzira”.

Ai e bëri këtë deklaratë në fjalimin me rastin e shënimit të 35-vjetorit të themelimit të Brigadës së Tretë Gardiste të Ushtrisë Kroate “Kune”.

“Kroacia askënd nuk e sheh si armik, dhe shpresoj që as ne askush nuk na sheh seriozisht si armik, përveç atyre që flasin marrëzira se Kroacia, Shqipëria dhe Kosova po përgatiten ta sulmojnë Serbinë. Me njerëz të tillë është vështirë të punohet dhe të ndërtohen marrëdhënie normale e miqësore, të cilat i synojmë”, u shpreh Milanoviq.

Presidenti kroat theksoi se Kroacia dëshiron të ndërtojë raporte paqësore dhe të qytetëruara me fqinjët, në dobi të ndërsjellë.
“Ne e dimë kush jemi, e dimë për çfarë jemi të aftë, e dimë se nuk kemi armiq dhe se duam të ndërtojmë marrëdhënie paqësore e të qytetëruara në dobi të ndërsjellë dhe të gjithanshme”, shtoi ai.

Sa i përket marrëdhënieve rajonale, Milanoviq vuri në dukje se, në kohën e zhvillimeve të paparashikueshme globale, Kroacia duhet së pari të rregullojë çështjet e brendshme dhe më pas raportet me fqinjët.
“Kroacia duhet ta rregullojë shtëpinë e vet dhe të përpiqet t’i rregullojë marrëdhëniet me fqinjët, me Serbinë dhe Bosnje e Hercegovinën, si dhe statusin e popullit kroat në Bosnje e Hercegovinë”, deklaroi ai.

Në akademinë solemne morën pjesë:

• Presidenti i Shoqatës së veteranëve të Brigadës “Kune”, Kreshimir Shiposh;
• Kryetari i qytetit të Slavonski Brod, Mirko Duspara;
• Prefekti i Qarkut Brodsko-Posavina, Danijel Marushiq;
• Komandanti i luftës i Brigadës, Mladen Kruljac;
• Shefi i Shtabit të Përgjithshëm, gjeneral-kolonel Tihomir Kundid;
• Zëvendëskryeministri dhe ministri i veteranëve, Tomo Medved.