Hysen Durmishi, ministër në detyrë i Infrastrukturës, foli në RTK për vërshimet e fundit në Kosovë. Ai vlerësoi se vendit i duhen intervenime të shpejta për të minimizuar dëmet e ardhshme nga përmbytjet.
I pyetur nëse qytetarët do të kompensohen për dëmet materiale, Durmishi sqaroi se pas vlerësimit nga komunat dhe institucionet përkatëse, Qeveria e Kosovës do të marrë përsipër këto dëme. Megjithatë, ai shtoi se buxheti nuk është miratuar ende, dhe kompensimi mund të bëhet ose në mbledhje të qeverisë ose pas miratimit të tij.
Durmishi përmendi nevojën për koordinim mes Ministrisë së Punëve të Brendshme, Ministrisë së Ambientit dhe komunave. Sipas tij, kjo do të mundësojë realizimin e projekteve që financoheshin nga niveli qendror dhe lokal, për të reduktuar raste të tilla në të ardhmen.
Sa i përket situatës aktuale, ministria ka filluar disa projekte për rregullimin e shtretërve të lumenjve, si masë parandaluese ndaj përmbytjeve.