Ministri për Punë, Familje dhe Vlerat e Luftës Çlirimtare, Andin Hoti, ka njoftuar se ligji për statusin e veteranëve të luftës së UÇK-së do të nënshtrohet vlerësimit retrospektiv gjatë këtij viti. Ky njoftim u bë publik më 26 shkurt 2026 nëpërmjet një postimi në Facebook.
Hoti shpjegoi se Ministria do të procedojë me 6 projektligje prioritare dhe 3 ligje për vlerësim ex-post, me qëllim përmirësimin e jetës së qytetarëve dhe forcimin e drejtësisë sociale. Këto masa prekin drejtpërdrejt kategoritë më të ndjeshme të shoqërisë.
Projektligjet e parapara për procedim janë:
- Projektligji për vlerësimin, njohjen e statusit, përfitimet dhe shërbimet për personat me aftësi të kufizuara;
- Projektligji për skemën e ndihmës sociale;
- Projektligji për Inspektoratin Qendror të Punës;
- Projektligji për ndryshimin dhe plotësimin e Ligjit nr. 04/L-023 për personat e zhdukur;
- Projektligji për ndryshimin dhe plotësimin e Ligjit nr. 03/L-212 të Punës;
- Projektligji për ndryshimin dhe plotësimin e Ligjit nr. 04/L-161 për sigurinë dhe shëndetin në punë.
Ligjet që do të vlerësohen janë:
- Ligji për skemat pensionale;
- Ligji për veteranët e luftës së UÇK-së;
- Ligji për statusin dhe të drejtat e dëshmorëve, invalidëve, veteranëve, pjesëtarëve të Ushtrisë Çlirimtare të Kosovës, viktimave civile dhe familjeve të tyre.
Sipas Hotit, vlerësimi ex-post analizon zbatimin praktik të ligjeve, efektet e tyre në terren, si dhe nevojën eventuale për ndryshime apo plotësime.