Ministri për Evropën dhe Punët e Jashtme, Ferit Hoxha, mori pjesë më 21-22 maj në takimin jozyrtar të ministrave të Jashtëm të vendeve anëtare të NATO-s, të zhvilluar në Helsingborg të Suedisë.
Në fjalën e tij, Hoxha nënvizoi angazhimin e palëkundur të Shqipërisë ndaj vlerave të NATO-s, forcimin e lidhjes transatlantike dhe rritjen e investimeve në mbrojtje. Ai deklaroi se buxheti i mbrojtjes për vitin 2026 përfaqëson nivelin më ambicioz të investimeve që nga anëtarësimi i Shqipërisë në Aleancë.
Ministri ripërsëriti mbështetjen e plotë të Shqipërisë për Ukrainën dhe vazhdimin e ndihmës përmes mekanizmave të NATO-s. Ai njoftoi se më 12 qershor Shqipëria do të bashkëorganizojë në Tiranë, së bashku me ministrin ukrainas Andrii Sybiha, Takimin Ministror Ukrainë-Evropë Juglindore.
Hoxha theksoi gjithashtu rëndësinë e një qasjeje 360 gradë ndaj sigurisë, me fokus të veçantë në stabilitetin e Lindjes së Mesme dhe të Ballkanit Perëndimor. Ai përmendi angazhimin e Shqipërisë për stabilitetin rajonal, përfshirë diskutimet mbi të ardhmen e KFOR-it dhe bashkëpunimin e NATO-s me Kosovën.
Ministri e cilësoi samitin e ardhshëm të NATO-s në Tiranë si një moment historik për rajonin dhe një sinjal të fortë të angazhimit të Aleancës ndaj Ballkanit Perëndimor.