Ministri për Evropën dhe Punët e Jashtme, Ferit Hoxha, ndodhet në Helsingborg të Suedisë, ku ka nisur Takimi Jozyrtar i Ministrave të Jashtëm të vendeve anëtare të NATO-s.
Takimi konsiderohet një hap i rëndësishëm në përgatitjet për Samitin e NATO-s që do të zhvillohet më 7 dhe 8 korrik 2026 në Ankara. Ministrat e Jashtëm të aleatëve pritet të diskutojnë prioritetet për forcimin e Aleancës, ndarjen e barrës mes vendeve anëtare dhe vijimin e mbështetjes për Ukrainën.
Në një postim në rrjetin social X, ministri Hoxha theksoi se diskutimet do të trajtojnë përgatitjet për samitin e ardhshëm dhe prioritetet strategjike të NATO-s në një mjedis sigurie gjithnjë e më sfidues. Ai do të rikonfirmojë angazhimin e Shqipërisë ndaj vlerave të Aleancës dhe forcimit të sigurisë kolektive, si dhe rritjen progresive të investimeve në mbrojtje.
Në planin rajonal, ministri do të theksojë rëndësinë e ruajtjes së vëmendjes strategjike të NATO-s ndaj Ballkanit Perëndimor.