Ferit Hoxha, ministër për Evropën dhe Punët e Jashtme, zhvilloi një takim me homologen suedeze Maria Stenergard në Bruksel, në kuadër të Këshillit të Punëve të Jashtme të BE-së.
Përmes një postimi në rrjetin social X, Hoxha bëri të ditur se palët rikonfirmuan marrëdhëniet e shkëlqyera mes Shqipërisë dhe Suedisë, përfshirë bashkëpunimin si aleatë në NATO. Gjatë bisedës u shkëmbyen mendime mbi prioritetet e përbashkëta, si zgjerimin e BE-së, sigurinë rajonale, bashkëpunimin euroatlantik dhe forcimin e partneritetit dypalësh.
Hoxha shprehu mirënjohjen për mbështetjen afatgjatë të Suedisë ndaj rrugës europiane të Shqipërisë, përfshirë ndihmën përmes Agjencisë Suedeze për Bashkëpunim Ndërkombëtar për Zhvillim (SIDA). Suedia vlerësohet si partner i çmuar në mbështetje të reformave, shtetit të së drejtës, konsolidimit demokratik dhe integrimit evropian.
Në takim u diskutua bashkëpunimi për përballimin e sfidave të përbashkëta, forcimin e qëndrueshmërisë, promovimin e zhvillimit të qëndrueshëm dhe avancimin e stabilitetit në Ballkanin Perëndimor.
Palët rikonfirmuan mbështetjen për Ukrainën në prag të takimit ministror të NATO-s, i cili do të mbahet më 21-22 maj në Helsingborg.