Ministri për Evropën dhe Punët e Jashtme, Ferit Hoxha, ka pritur më 13 maj në Tiranë delegacionin e Komisionit të Punëve të Jashtme të Parlamentit Suedez, të udhëhequr nga Morgan Johansson.
Në takim patën një diskutim konstruktiv, ku Hoxha shprehu vlerësimin për mbështetjen e vazhdueshme të Suedisë ndaj procesit të anëtarësimit të Shqipërisë në BE, si dhe për kontributin e saj në zhvillimin demokratik, institucional dhe socio-ekonomik të vendit.
Palët shkëmbyen mendime mbi progresin e Shqipërisë në negociatat e anëtarësimit në BE. Hoxha theksoi rëndësinë e ruajtjes së momentumit të reformave dhe avancimit në prioritetet kryesore, si sundimi i ligjit, institucionet demokratike dhe qeverisja e mirë.
Gjithashtu, diskutuan nevojën për t’u përballur me sfidat rajonale dhe globale përmes koordinimit, dialogut dhe bashkëpunimit më të ngushtë midis partnerëve dhe aleatëve.
Hoxha nënvizoi angazhimin e Shqipërisë për të forcuar marrëdhëniet dypalëshe me Suedinë, duke thelluar bashkëpunimin parlamentar dhe duke zgjeruar atë në fushat me rëndësi strategjike të përbashkët. Ai vlerësoi miqësinë dhe partneritetin suedez, duke shprehur pritshmëri për vazhdojmërinë e bashkëpunimit në mbështetje të një Europe më të fortë dhe të bashkuar.