Ferit Hoxha, Ministër për Evropën dhe Punët e Jashtme, zhvilloi më 18 prill 2026 një takim me Radmila Shekerinska, Zëvendës Sekretare e Përgjithshme e NATO-s.
Gjatë takimit u diskutua angazhimi i Shqipërisë ndaj Aleancës, roli i saj në forcimin e sigurisë në Ballkanin Perëndimor, mbështetja për Ukrainën, situata e sigurisë rajonale dhe përgatitjet për Samitin e ardhshëm të NATO-s në Tiranë. Hoxha theksoi linjëzimin e plotë të Shqipërisë me prioritetet e NATO-s në prag të Samitit të Ankarasë, modernizimin e Forcave të Armatosura, rritjen e shpenzimeve për mbrojtje në 2026 dhe zhvillimin e industrisë vendase të mbrojtjes përmes investimeve strategjike e partneriteteve afatgjata.
U nënvizua rëndësia e angazhimit të qëndrueshëm të NATO-s për stabilitetin në Ballkan dhe mbështetja ndaj Kosovës përmes KFOR-it. Hoxha prezantoi përgatitjet për Samitin e parë të nivelit të lartë në rajon, duke theksuar koordinimin e ngushtë me selinë e NATO-s.
Në një postim në rrjetin social X, Ministri Hoxha shkroi:
"Sot zhvillova një takim produktiv me Radmila Shekerinska, Zëvendës Sekretare e Përgjithshme e NATO-s. Gjatë takimit diskutuam mbi angazhimin e palëkundur të Shqipërisë ndaj Aleancës, mbështetjen e vazhdueshme për Ukrainën, situatën e sigurisë në Ballkanin Perëndimor, si dhe përgatitjet e Shqipërisë për organizimin e Samitit të ardhshëm të NATO-s në Tiranë. Konfirmova linjëzimin e plotë të Shqipërisë me prioritetet e NATO-s në prag të Samitit të Ankarasë. Shqipëria mbetet një aleate e vendosur, duke vijuar modernizimin e Forcave të Armatosura, rritjen e shpenzimeve për mbrojtjen në 2026, si dhe zhvillimin e industrisë vendase të mbrojtjes përmes investimeve strategjike dhe partneriteteve afatgjata. Gjithashtu, prezantova përgatitjet e Shqipërisë për të pritur Samitin e ardhshëm të NATO-s në Tiranë, i pari i këtij niveli në rajonin tonë, duke vënë në dukje koordinimin e vazhdueshëm me selinë e NATO-s dhe angazhimin tonë për të garantuar një Samit të suksesshëm dhe me ndikim të rëndësishëm. Sa i përket Ballkanit Perëndimor, nënvizuam rëndësinë e angazhimit të qëndrueshëm të NATO-s për ruajtjen e stabilitetit rajonal dhe adresimin e sfidave të reja të sigurisë. Po ashtu, rikonfirmova mbështetjen e fortë të Shqipërisë për KFOR-in, duke theksuar rolin e tij thelbësor në garantimin e sigurisë në Kosovë dhe në rajon."