Në vijim të vizitës së tij zyrtare në Spanjë, që përkon me 40-vjetorin e rivendosjes së marrëdhënieve diplomatike midis dy vendeve, Ministri për Evropën dhe Punët e Jashtme, Ferit Hoxha, zhvilloi takime të rëndësishme në Madrid më 17 dhe 18 mars 2026.
Më 17 mars, Hoxha u prit nga homologu spanjoll José Manuel Albares Bueno. Bisedimet u përqendruan në zgjerimin e bashkëpunimit dypalësh, me theks në ekonomi, turizëm dhe procesin e integrimit evropian të Shqipërisë. Të dy kryediplomatët vlerësuan potencialin e pashfrytëzuar ekonomik, duke diskutuar mundësitë për rritjen e tregtisë, turizmit dhe energjisë së qëndrueshme. Albares ritheksoi mbështetjen e Spanjës për rrugëtimin evropian të Shqipërisë dhe ofroi asistencë teknike për përmbushjen e standardeve evropiane.
Më 18 mars, Hoxha vizitoi Senatin e Spanjës, ku u takua me Zëvendëskryetarin e Parë Javier Maroto, Kryetaren e Komisionit për Punët e Jashtme Pilar Rojo Noguera si dhe anëtarë të tjerë të Senatit. Në takime u zhvilluan diskutime të thelluara mbi procesin e zgjerimit të Bashkimit Evropian, ecurinë e negociatave të Shqipërisë dhe angazhimin e përbashkët për një proces anëtarësimi të besueshëm e të bazuar në meritë.
Ministri Hoxha shprehu mirënjohjen për mbështetjen e vazhdueshme të Spanjës dhe shkëmbeu pikëpamje mbi marrëdhëniet transatlantike si dhe rolin në rritje të diplomacisë parlamentare. Ai postoi për këto zhvillime në platformën X, ku theksoi kënaqësinë nga vizita në Senat.