Ministri për Evropën dhe Punët e Jashtme, Ferit Hoxha, priti në një takim zyrtar në Tiranë delegacionin e Komisionit për Çështjet Evropiane të Asamblesë Kombëtare të Francës, të kryesuar nga Pieyre-Alexandre Anglade.
Diskutimet u përqendruan te dinamikat aktuale në procesin e zgjerimit të Bashkimit Evropian dhe rëndësia e ruajtjes së ritmit dhe besueshmërisë së këtij procesi për vendet aspirante. Ministri Hoxha rikonfirmoi angazhimin dhe vendosmërinë e Shqipërisë për të vijuar me reformat e nevojshme, duke theksuar ambicien e qeverisë shqiptare për t’u bërë anëtare e BE-së brenda dekadës aktuale.
“Me një plan të qartë, rezultate konkrete dhe ambicien për t’u bërë anëtare e Bashkimit Evropian brenda kësaj dekade, Shqipëria është e vendosur të shfrytëzojë këtë dritare historike mundësie, duke kontribuar në një Evropë më të fortë, më të sigurt dhe më të bashkuar”, deklaroi ministri Hoxha.
Sipas kreut të diplomacisë, mbështetja dhe angazhimi i Francës në të gjitha nivelet, përfshirë dimensionin parlamentar, mbeten thelbësore për ecurinë e procesit të integrimit dhe forcimin e perspektivës evropiane si për Shqipërinë, ashtu edhe për rajonin e Ballkanit Perëndimor. Gjithashtu, në takim u vlerësua roli kyç i Francës në ndërtimin e një Evrope më strategjike dhe më të bashkuar.