Ministri për Evropën dhe Punët e Jashtme i Shqipërisë, Ferit Hoxha, zhvilloi një takim me të Dërguarin e Posaçëm të Francës për Ballkanin Perëndimor, René Troccaz. Takimi u zhvillua gjatë qëndrimit të palëve në Przno të Malit të Zi.
Bisedimet mes dy përfaqësuesve u fokusuan në procesin e anëtarësimit të Shqipërisë në Bashkimin Evropian dhe zhvillimet aktuale në rajonin e Ballkanit Perëndimor. Përveç perspektivës evropiane të vendit, palët vlerësuan domosdoshmërinë e forcimit të bashkëpunimit rajonal, ndërlidhjes dhe sigurisë si elemente me rëndësi strategjike.
Përmes një reagimi në rrjetin social X, ministri Hoxha vlerësoi partneritetin mes Shqipërisë dhe Francës, duke theksuar se mbështetja franceze mbetet thelbësore për rrugëtimin evropian. Ai shprehu përkushtimin e qeverisë shqiptare për të bashkëpunuar ngushtë me partnerët francezë, me qëllim konsolidimin e stabilitetit dhe afrimin e pakthyeshëm të rajonit drejt Bashkimit Evropian. Gjithashtu, u theksua se procesi i zgjerimit duhet të jetë i besueshëm dhe të bazohet tërësisht në meritat e shteteve përkatëse.