Pas mbledhjes së qeverisë më 19 mars 2026, ministri i Infrastrukturës dhe Energjisë, Enea Karakaçi, refuzoi propozimin e Partisë Demokratike për uljen e taksës së qarkullimit, në mënyrë që të zbritet çmimi i naftës në 214 lekë/litër.
I pyetur nga gazetarët për projektligjin e PD-së, ministri deklaroi se çdo vend i Bashkimit Evropian ka taksën e qarkullimit. Ndërsa disa e zbatojnë te automjetet, Shqipëria e ka te karburanti, sepse kështu paguan më shumë taksë ata që përdorin më shumë automjetin.
"Taksa e qarkullimit për t’u ulur 45 lekë nënkupton që të jetë 45 lekë. Nuk është aq lekë. Ne kemi ndjekur një model tjetër. Taksa e qarkullimit është në BE, disa e segmentojnë te karburanti, disa te mjetet. Ne e kemi gjykuar te karburanti", u shpreh Enea Karakaçi.
Ministri shtoi se qeveria po ndjek me grupet e interesit tregun e karburanteve, ku ka modele të ndryshme. Qeveria ka zbatuar modelin e vendosjes së një çmimi tavan dhe nuk ka ende vendimmarrje për Bordin e Transparencës. Ky bord mund të krijohet me një vendim të Këshillit të Ministrave, siç u njoftua edhe më herët.