Ministri i Mbrojtjes, Ermal Nufi, zhvilloi më 15 prill 2026 në Bruksel një takim me kryetarin e Komitetit Ushtarak të NATO-s, Giuseppe Cavo Dragone. Takimi synoi forcimin e dialogut strategjik dhe thellimin e bashkëpunimit midis Shqipërisë dhe Aleancës në çdo nivel institucional.
Në fokus të bisedimeve ishte situata në Kosovë dhe roli i misionit të KFOR-it në garantimin e stabilitetit dhe paqes në rajon. Palët diskutuan gjithashtu për projekte strategjike si Korridori VIII dhe zhvillimi i Porto Romanos, të cilat u vlerësuan të rëndësishme për avancimin e interesave kombëtare dhe rajonale, me mbështetjen e mëtejshme të NATO-s.
Nufi theksoi angazhimin e Shqipërisë për të forcuar rolin e saj në NATO, në funksion të paqes, sigurisë dhe stabilitetit jo vetëm në rajon, por edhe më gjerë. Në një postim në rrjetet sociale, ai shkroi: «Takim i rëndësishëm me Giuseppe Cavo Dragone, Kryetar i Komitetit Ushtarak të NATO, në funksion të forcimit të dialogut strategjik dhe thellimit të bashkëpunimit të Shqipërisë me Aleancën në çdo nivel. Vëmendje e veçantë ndaj Kosovës dhe rolit të KFOR në garantimin e stabilitetit dhe paqes. Roli strategjik të Korridori VIII dhe zhvillimi i Porto Romanos me mbështetjen e mëtejshme nga Aleanca, i rëndësishëm për avancimin e projekteve me rëndësi kombëtare dhe rajonale. Shqipëria mbetet e përkushtuar për të forcuar më tej rolin e saj në NATO, në funksion të paqes, sigurisë dhe stabilitetit në rajon dhe më gjerë».
Një ditë më parë, Nufi u takua edhe me sekretarin e përgjithshëm të NATO-s, Mark Rutte, ku biseduan për sigurinë në Ballkanin Perëndimor dhe luftën në Ukrainë.