Ministria e Shëndetësisë ka bërë apel prindërve për vaksinimin e djemve të moshës 13 vjeç kundër Human Papillomavirus (HPV). Ky infeksion viral nuk prek vetëm vajzat, por edhe djemtë, dhe mund të shkaktojë sëmundje, lezione prekanceroze si dhe kancer.
Mjekja Rovena Daja nga ISSH shpjegon se vaksina kundër HPV-së aplikohet falas në të gjitha qendrat shëndetësore. Që nga fillimi i muajit janar 2026, kjo vaksinë aplikohet edhe te djemtë, pas përfshirjes së vajzave të moshës së njëjtë në kalendarin kombëtar të vaksinimit që nga 1 nëntori 2022.
Në mesazhin e saj, Rovena Daja thekson se vaksinimi i të dyja gjinive ul ndjeshëm përhapjen e virusit. "HPV nuk prek vetëm vajzat. Përvoja ndërkombëtare tregon se vaksinimi i të dyja gjinive çon në më pak infeksione dhe hedh bazat për eliminimin e kancerit të qafës së mitrës", thuhet në apel.
Sipas Ministrisë, vaksinimi i djemve redukton transmetimin e virusit te partnerët dhe forcon imunitetin e popullatës, duke mbrojtur edhe personat e pavaksinuar. "Kur djemtë vaksinohen, ulet ndjeshëm përhapja e HPV-së, reduktohet transmetimi i virusit te partnerët dhe forcohet imuniteti i popullatës", nënvizohet në deklaratë.
Ministria fton prindërit të drejtohen te qendrat shëndetësore për vaksinimin sipas kalendarit kombëtar, duke e cilësuar si "një hap të vogël sot, një hap të madh për të ardhmen".